पुणे: शनिवारी पहाटे पाचच्या सुमारास बाह्यवळण महामार्गावरील वडगाव ब्रिजजवळ झालेल्या भीषण अपघातात दोन तरुणांचा मृत्यू झाला. वाढदिवस साजरा करून घरी परतत असताना काळाने घाला घालल्याने परिसरात हळहळ व्यक्त केली जात आहे.

प्राप्त माहितीनुसार, शनिवारी पहाटे वडगाव ब्रिजजवळ उभ्या असलेल्या बसला मागून भरधाव स्विफ्ट कारने जोरदार धडक दिली. या दुर्घटनेत कारमधील सहा जणांपैकी दोन जणांचा जागीच मृत्यू झाला, तर चार जण गंभीर जखमी झाले. अपघातानंतर त्यांना तातडीने नवले हॉस्पिटलमध्ये हलवण्यात आलं आणि नंतर पुढील उपचारांसाठी खासगी रुग्णालयात दाखल करण्यात आलं आहे.

अपघाताची माहिती मिळताच पोलिसांनी घटनास्थळी धाव घेतली. घटनेचा पंचनामा करून मृतदेह शवविच्छेदनासाठी पाठवण्यात आले असून, जखमींवर उपचार सुरू आहेत. पोलिसांनी संबंधित कुटुंबीयांना या अपघाताची माहिती दिली आहे.